Baazgasht بازگشت

عید مبارک

2006-10-27T16:56:00.002+05:00

تھوڑی دیر معاف کر دیں تو

عید مبارک۔

چاند کی بات

2006-09-25T10:32:00.000+05:00

اب کی بار بھی وہی ہوا جو ہر بار ہوتا ہے یعنی ملک میں تین مختلف دنوں میں چاند دیکھا گیا۔ صوبہ سرحد کے کچھ علاقوں میں پرسوں روزہ تھا کچھ مزید علاقوں کل اور پورے ملک میں آج پہلا روزہ ہے۔اور امید ہے کہ عید بھی اسی طرح تین دن پڑھی جائے گی۔ میں ہر سال سوچتا ہوں کہ آخر یہ چکر کیا ہے ؟ یہ ہو نہیں سکتا کہ مرکزی رویت ہلال کمیٹی جان بوجھ کر ایک دن بعد میں روزہ رکھوائے یا عید کروائے یہی ان لوگوں کے متعلق بھی کہا جاتا ہے جو ایک یا دو دن پہلے چاند دیکھ لیتے ہیں۔ سوال یہ ہے کہ کسی کو چاند ایک دن پہلے یا بعد میں دیکھنے سے کیا نفع یا نقصان ہو سکتا ہے؟

کبھی کبھی خیال آتا ہے شاید اس کی کوئی سائنسی وجہ ہو !
اس موضوع پر کچھ مقالات بھی پڑھے لیکن ہنوز تشفی نہیں ہوئی، آپ کیا کہتے ہیں ؟

رمضان مبارک ہو

2006-09-24T22:06:00.000+05:00

تمام اہلِ اسلام کو رمضان مبارک ہو۔ اپنی دعاؤں میں مجھے اور تمام مسلمان بھائیوں کو ضرور یاد رکھیے گا۔

ڈا کٹر خان کے نام

2006-08-31T19:36:00.000+05:00

تو بخت کا امین ہے محسن ہے اس زمین کا
وطن کا پاسبان ہے تو سائبان دین کا
دماغ سے اجالتا رہا وطن کی سلوٹیں
جو کاروان زندگی میں نام ہے یقین کا

پہاڑ کی جبیں کو توڑ کر جو خود بکھر گیا
مگر حسن تو کشور مراد کا نکھر گیا

اسی طرح کے لوگ آبرو ہیں کائنات کی
صراط منزل وفا نہ جانے اب کدھر گیا

عبدالقدیر خان نشاط سحر کا جواز ہے
ہمیشہ قوم کی جو مشکلوں میں کار ساز ہے

مقام دے سکے نہ ہم اسیر شعلہ زار کو
صدا ہے وہ بہار کی دلوں کا جو گداز ہے

بڑی ہی دیر سے تھا ملک منتظر بہار کا
تو دیدہ ور کی شکل میں پتہ ملا عطار کا

سدا کی الجھنوں کے خوف میں تھے ہم گھرے ہوئے
کہ سایہ مل گیا ہمیں حسین غمگسار کا

جوملت قدیم کے خلوص کا امین ہے
شکوہ سلطنت کا پاسباں روح مبین ہے

مسخرات میں لیا ہے ذرہ مسکبری
اس لیے سکون سے امن میں یہ زمین ہے

وہ چارہ گر کہ جس نے زندگی کو نور کردیا
مخالفوں کے دل میں خوف ہیبتوں کا بھر دیا

یہ اس کی محنتوں کا پھل ہے کہ آج سر بلند ہیں
کمال جستجو سے ہم کو بامراد گھر دیا

وہ خان محترم ہماری چاہتوں کا نام ہے
کرم کے منہ پر خاک ڈالنا سدا حرام ہے

تمہارے علم و آگہی کے سامنے جھکی ہوئی
عمار پا ک سر زمین کا تجھے سلام ہے

شاعر : - سید عمار جعفری

نواب ا کبر بگتی کا قتل

2006-08-31T19:19:00.000+05:00

نواب اکبر بگتی کو قتل کر دیا گیا۔ اس واقعے سے پہلے امریکہ کے کی مسلح افواج کے میگزین میں رالف پیٹر کا ایک مضمون Blood Brder کے عنوان سے شائع ہوا تھا جس میں مسلم ممالک کا “بش پسند “ نقشہ شائع کیا گیا تھا جس میں پا کستان اور ایران کے بلوچستان کو ملا کر ایک الگ ریاست کا درجہ دیا جائے گا۔ اور پا کستان صرف کراچی اور پنجاب پر مشتمل ہوگا۔
ایسے وقت ایک 80 سالہ بوڑھے کو مار کر ہم نے ملک کی کون سی خدمت سر انجام دی اس کا جواب خود “ انجمن ستائش بادشاہ سلامت “ المعروف ق لیگ کے پاس ہے نہ خود بادشاہ سلامت کے پاس۔ پچھلے چار دنوں میں نہ جانے کتنے ہی موقف اختیار کیے گئے ہیں اور یہ سلسہ جاری ہے۔

محسنِ پا کستان ڈا کٹر عبدالقدیر خان کے نام

2006-08-31T18:52:00.000+05:00

اس دوران ایک خبر یہ آئی کہ ہمارے ہیرو محسن پا کستان جناب ڈاکٹر عبدالقدیر خان کو کینسر ہو گیا ہے ۔ ڈا کٹر خان نے ہمارے درد کا درماں کیا تھا اور ہم نے ان کے ساتھ جو کیا وہ انہوں نے بقول خود ان کے اللہ کے سپرد کر دیا ہے۔ حکومت کو چاہیے کہ ان کی نظر بندی ختم کردے مگر ایسا ہوگا نہیں کیونکہ اس کے لیے “ بڑے صاحب “ کی اجازت چاہیے۔ اور ہم آج کل اپنے پاؤں پر کلہاڑی مارنے کے لیے بڑے صاحب کی اجازت ضروری سمجھتے ہیں۔ خدا ہم پر رحم کرے۔
دعا ہے کہ خدا ڈا کٹر خان کو صحت و تندرستی عطا فرمائے۔

واپسی

2006-08-31T18:18:00.000+05:00

بہت دن گزر گئے حا لانکہ میرا ارادہ محض دو ایک دن غائب رہنے کا تھا۔ اس دوران ایک دن ایک تحریر لکھی تھی جو کہ ایک دن بلاگ پر بھی موجود رہی دوسرے دن ایک خیال کے تحت اسے ایڈٹ کرنے کی ضرورت محسوس ہوئی لیکن جب ایڈٹ کرنے کے بعد پبلش کی تو کچھ عجیب سی تصویر تھی۔ بار بار کوشش کے بعد اس کی حالت نہ سدھری ، لہٰذا ۔۔۔۔۔۔۔۔ بحر حال اس سے مجھے ایک سبق یہ حاصل ہوا کہ آئندہ ہر پوسٹ کا بیک اپ ضرور رکھوں گا۔

تراشے

2006-08-12T20:30:00.000+05:00

خاتون نے اپنی بیٹی سے پوچھا: تمہارا شوہر کہاں ہے؟
وہ سو رہے ہیں: بیٹی کا جواب تھا۔
گھر آ کر سوتا ہے دفتر میں کیا کرتا ہے؟ خاتون نے حیرت کا اظہار کیا۔
سونا مجھے زیادہ مرغوب نہیں البتہ نوائے وقت اور ایکسپریس میں جو کچھ لکھا ہوتا ہے وہ سب پڑھنا پڑتا ہے، “ پڑھنا پڑتا ہے “ سے آپ یہ سمجھیں کہ خدا نخواستہ یہ میرے فرائضِ منصبی کا حصہ ہے نہیں بلکل نہیں۔ بس اس کے علاوہ اور کوئی کام۔۔۔۔۔۔۔۔۔ میرا مطلب ہے اگرکوئی کام کرنا آتا ہوتا تو گھر والے مجھے یہاں کیوں بھیجتے وہیں کہیں ہل چلاتا ، گھاس کاٹتا مویشی چراتا اور چین کی بنسی بجاتا، اس بات پر اسلام آباد ریڈیو کے کمپئر اور پرڈیوسر جناب ظفر خان نیازی یاد آئے ایک دفعہ کہہ رہے تھے عجیب دور ہے جس سے پوچھو جاب کیسی جارہی ہے جواب میں یہی کہتا ہے“ بہت اچھی، کام ہی نہیں کرنا پڑتا“ تو یہ سارا قصہ ہے ۔ کہ روزانہ دو اخبارات پر اکتفا اس لیے کہ کام کے اوقات میں دو ہی دستیاب ہیں۔ اور پھر سارے پسندیدہ لکھنے والے بھی انہی دونوں میں ا کٹھے ہوگئے ہیں، ورنہ چائے کے لیے ایسا ہوٹل تلاش کرنا پڑتا تھا جہاں روزنامہ جنگ آتا ہو۔ تو کہنے دیجیے کہ جاوید چوہدری، حسن نثار اور عبدالقادر حسن کی ایکسپریس میں آمد کے کچھ دیگر “ عوامل“ بھی کارفرما ہونگے وہیں اپنی “ روحانی قوت “ کا بھی کچھ دخل ہے۔
اور جناب ادھر اپنی یاداشت کی حالت بہت دگرگوں ہے بات بے بات بھول جاتا ہوں بعض اوقات یہ بھی بھول جاتا ہوں کہ کیا بھولا ہوں۔؟ قرض لے کر بھول جانا تو بین القوامی مرض ہے اپنی حالت یہ ہے قرض دے کر بھی یاد نہیں رہتا۔ آج صبح ہی اپنے دوست آصف کی کھری کھری سننی پڑیں، بات صرف اتنی سی تھی کہ اس نے کچھ پیسے مجھے دیے اور میں نے اس عنایت کی وجہ دریافت کی، اور موصوف کی زبان حقیقتاّ قینچی کی طرح چلتی ہے “ ہاں تم تو لاکھ پتی ہونا ( ایسا اس نے طنزاّ کہا کہیں آپ سمجھیں کہ ۔۔۔) یہ چھوٹی سی رقم تمہیں یاد ہی نہیں رہتی وغیرہ وغیرہ ، آخر میں ثابت ہوا کہ دراصل وہ میرا قرض لوٹا رہا تھا۔ اسی طرح ڈھیروں ایسی مثالیں ہیں جن میں ایسی باتیں بھی بھول جاتا ہوں جو بھولنے کی نہیں ہوتیں۔ ( اللہ بخشے عزیز میاں بھی نہیں رہے جو جھوم جھوم کر یاد دلایا کرتے تھے “ بھول جانے کے قابل نہیں ہے“ ) کہنے کا مطلب یہ ہے کہ یاداشت کی یہ کمزوری دوستوں میں ضرب المثل بنتی جارہی ہے اور ا کثر دوستوں کی طرف سے طعنوں اور کوسنوں وغیرہ سے سینہ چھلنی کرنے کی کوشش ہوتی رہتی ہے۔
مگر جناب ہم نے بھی کچی گولیاں نہیں کھیلیں ( اللہ جانتا ہے اس محاورے کا مطلب کبھی سمجھ نہیں آیا) اپنے سینے پر ایسی ہی ڈھال چڑھا رکھی ہے جیسی عرب لیگ کے اجلاس میں شریک حضرات ( اور شاید ایک آدھ خاتون بھی ) نے چڑھا رکھی تھی کہ لبنان کے وزیرِ اعظم رو رہے تھے اور ان لوگوں نے تالیاں بجانا ضروری سمجھا ( آخر رسمِ دنیا بھیکوئی چیز ہے )۔
بات کہاں سے شروع ہوئی اور کہاں نکل آئی ؟ کہنا یہ چاہتا تھا کہ لندن سے امریکہ جانے والے طیاروں کے دھما کہ خیز مواد سے اڑا دینے کی سازش کوا کثر کالم نگاروں نے بجائے خود ایک سازش قرار دیا ہے ان کا کہنا ہے کہ یہ سب کچھ اسرائیل کی لبنان میں جاری جارحیت سے توجہ ہٹانے کے لیے کیا گیا۔ میں کالم نگاروں کے یہ خیالات یاد رکھنا چاہتا تھا اس لیے میں نے سوچا کچھ اخبارات کے تراشے اپنے بلاگ پر رکھ لیے جائیں تو کیا مضائقہ ہے۔ تو بسم اللہ کرتے ہیں۔
نوائے وقت کے کالم نگار جناب عرفان صدیقی اپنے کالم نقشِ خیال میں لندن دھماکوں پر تبصرہ کرتے ہیں۔ “ ہمارے پاس ایسے شواہد نہیں کہ اس سازش کو جھٹلادیا جائے یا اس فتنہ سامانیوں کے نامہرباں موسموں کا ایک نیا شگوفہ قرار دے کر رد کر دیا جائے۔ ممکن ہے کچھ سر پھروں نے ایسا منصونہ بنایاہو۔ ممکن ہے انہوں نے اپنے دلوں میں کھولتے لاوے کو اس نوع کے اقدام میں ڈھال کر انتقام کی کوئی راہ سوچی ہو۔ بلاشبہ ایسی کوششیں ناقابلِ ستائش ہیں نہ ان کی تائید کی جانی چاہیے۔ مہذب دنیا، مہذب قرینے مانگتی ہے۔ انسانیت، انسانی جان مال کی حرمتت کا تقاضا کرتی کسی نے گناہ کی جان لینا ہمارے دین کی اساسی تعلیمات کے بھی خلاف ہے۔“ اور مزید آگے چل کر لکھتے ہیں “ حقیقت یہی ہے کہ کوئی اسلامی ملک ، کوئی مسلم تنظیم اور کوئی سرکش گروہ “ دہشت گردی “ کو فروغ نہیں دے رہا۔ اس کے سرچشمے امریکہ ، برطانیہ اور مغرب سے پھوٹ رہے ہیں ۔ سیدھے سادھے معصوم انسانوں کے دلوں میں انتقام کا الاؤ روشن کرنے والی ساری ہوائیں سات سمندر پار سے آرہی ہیں ۔ امریکہ ، علم و حکمت کے خزانوں کا امین ہونے اور مستقبل تراشی کے ہنر پر بھر پور دسترس رکھنے والے تھنک ٹینکس کے باوجود یہ چھوٹی سی بات نہیں سمجھ رہا کہ شہنشاہ علم پناہ کی پالیسیاں ساری دنیا، بالخصوص عالمِ اسلام میں کانٹوں کی کیسی فصل بو رہی ہیں ؟ نہتے اور بے دست و پا مسلمانوں کو کس طرح مشتعل کر رہی ہیں ؟ معمول کی زندگی گزارنے والے بے ضرر سے نوجوانوں لو کیونکر خود کش بمبار ، بنا رہی ہیں؟
اپنے کالم کے آخر لکھتے ہیں “ سازشی اپنا مقصد حاصل نہیں کر سکے اور پکڑے گئے لیکن سازش کے انکشاف نے کم از کم اسرائیل ، امریکہ ، برطانیہ اور دوسرے حاشیہ نشینوں کو یہ فائدہ ضرور پہنچایا ہے کہ ساری دنیا کے ذرائع ابلاغ کی توجہ لبنان پر اسرئیلی جارہیت سے ہٹ گئی ہے ۔ اب وہ اور زیادہ اطمینان و سکون کے ساتھ اپنے “ مشن“ پر توجہ دے سکے گا۔ دنیا لبنان کی کھنڈر ہوتی بستیوں، بموں کا رزق ہوتے بچوں اور بے خانماں ہونے والے لاکھوں افراد کا نوحہ پڑھنے اور اسرائیل کی درندگی پر نفرین کرنے کی بجائے ان فرضی طیاروں کے سوگ میں کھو جائے گی جو “ سازش “ کی تکمیل کی صورت میں پھٹ جاتے اور نہ جانے کتنے لوگ لقمہ اجل ہو جاتے۔ مکمل کالم
جناب عطاء الرحمان نے بھی اسی موضوع پر خامہ فرسائی کی ہے “ مسلم دہشت گردوں کے بارے میں آپ جو رائے قائم کریں ۔ انہیں ان القابات سے نوازیں جو امریکہ اور اسرائیل نے وضع کر رکھے ہیں یا مسلمانان عالم کے جائز ترین حقوق اور ان کی آزادی کا مجاہد قرار دیں ۔ اس سے انکار نہیں کیا جاسکتا کہ ان کے اندر راز راز کو راز رکھنے اور اپنے منصوبوں کو پردہ اخفا میں رکھنے کی غیر معمولی صلاحیت پائی جاتی ہے۔ اس کا انہوں نے قدم قدم پر مظاہرہ کیا ہے۔ لیکن یہ اچانک کیا ہو گیا ہے کہ لندن سے اڑ کر امریکہ جانے والے 9 طیاروں کو اڑا کر رکھ دینے کی جو سازش وہ تیار کر رہے تھے وہ وقت سے پہلے طشت از بام ہوگئی ہے۔ مزید کے لیے۔۔۔
ہارون الرشید صاحب نے لکھا “ غور و فکر کرنے والوں کے نزدیک سب سے اہم نکتہ یہ ہے کہ مغرب کی خفیہ ایجنسیوں نے پورے کرہ ارض کو لرزا دینے والا دھماکہ کس وقت کیا؟۔۔۔ اس وقت جب لبنانی شہریوں کا قتلِ عام جاری ہے اور اسرائیل نے اپنے مقاصد پورے نہ ہونے پر حملوں میں توسیع کا فیصلہ کیا ہے۔ عالم اسلام میں رد عمل کی ایک لہر جاری ہے اور شدید ہوتی جارہی ہے۔ یہی نہیں خود مغرب میں بھی ہر گزرتے دن کے ساتھ اسرائیل کی حمایت اس کے باوجود کمزور ہوتی جارہی ہے کہ طاقتور ذرائع ابلاغ پوری قوت سے یہودیوں کی پشت پر کھڑے ہیں۔“ آگے چل کر ایک جگہ لکھتے ہیں ۔ “ نفرت میں اندھا کون ہے؟ یقیناّ امریکہ نہیں جس نے جاپان کے دو ہنستے بستے شہروں کو نذرِ آتش کر دیا اور انسانوں کی انتی بڑی تعداد قتل کر دی گئی کہ پچھلی صدی کی تمام جنگوں میں مجموعی طور پر نہ ہوئی ہوگی ۔ وہ لوگ ت وبہر حال اندھے نہیں ہیں افغانستان اور عراق میں قتلِ عام کے باجود جن کے دل ٹھنڈے نہیں ہوئے اور جن کا بس (چلے ) تو شام اور ایران کو مذبحوں میں بدل ڈالیں۔ مغرب کے نقطہ نظر سے قابلِ نفرت تو دوسرے ہیں کو مکمل طور پر تسلیم کرلیا جائے۔۔۔۔۔۔۔ تو وہ جن کا زیادہ جرم یہ تھا کہ وہ مسلسل توہین اور ہمہ جہت جارہیت کا بدلہ لینے کی خواہش میں، مریضانہ منصوبہ بندی پر اتر آئے تھے۔ اگر کوئی مغرب کے مفکرین کو متوجہ کر سکتا ہے تو اسے متوجہ کرنا چاہیے کہ ان کے رہنما بھٹک گئے ہیں اور اس بری طرح بھٹک گئے کہ پوری انسانیت کا مستقبل سوالیہ نشان بن سکتاہے۔ مزید دیکھیے
مزید کچھ کالم پڑھنے کے لائق ہیں لیکن اس وقت صرف ایک ہی موضوع یعنی “ لندن سازش “ تھا۔

غریب لوگ

2006-08-07T18:48:00.000+05:00

گرمی، حبس ، پانی کی کمی اور لوڈشیڈنگ اس پہ مستزاد۔۔۔۔۔ لوگ مرنے لگے۔ “ بادشاہ سلامت “ نے اعداد و شمار سے ثابت کر دکھایا کہ لوڈشیڈنگ کا باعث ترقی ہے ۔ ڈیم تیزی سے خالی ہورہے تھے مزید سخت دنوں کی پیشین گوئی تھی کہ آسمان برس پڑا ایسی رم جھم ہوئی کہ اگلا پچھلا حساب چکتا کیا۔ لیکن اس رم جھم کا نغمہ اتنا ہی دلفگار و د آزار ہے جتنا نیرو کی بانسری یا کونڈو لیزارائس کا پیانو۔ چند دنوں سے مجھے محسن نقوی ایک شعر بار بار یاد آرہا ہے۔

غریب لوگ تو محسن تنکوں کا ڈھیر ہیں
ملبے میں دب گئے ، کبھی پانی میں بہہ گئے

کہیں نالے بہہ کر آبادی کا رخ کررہے ہیں اور کہیں ڈیموں کا پانی آپے سے باہر ہورہا ہے اور بیچارے غریب لوگ۔۔۔۔۔۔ ان غریبوں کے نمائندے اس بار پھر ندی نالوں پربندباندھنے کے لیے بڑی بڑی گرانٹیں جاری کروائیں گے، دلوں کی ساری سیاہی کاغذوں پر منتقل کر دی جائے گی اور اگلی بارش۔۔۔۔۔۔۔۔
یہ صرف ہماری کہانی نہیں، یہ تو پوری مسلم دنیا کی کہانی ہے کیا ہوا اگر ہم کشکول بردار ہیں لیکن غریب تو وہ بھی ہیں جن کے خزانے قارون کے خزانوں پر بھاری ہیں۔جن کا تیل امریکہ کے پانی سے بھی سستا ہے، جن کے درھم ، دینار اور ریال طوائفوں کی اداؤوں کی نذر ہو جاتے ہیں۔ ہماری جیب خالی ان کا ظرفِ ایمان خالی، ہم کشکول بدست اور ان کا ذہن دیوالیہ۔
پھر زمین و آسمان کیوں نہ دشمن ہوں کہ بے عمل اور خوابوں کی دنیا میں مست رہنے والوں کے لیے اس دنیا میں کچھ نہیں۔

یہ منظر آپ اپنی داستان ہیں

2006-08-02T18:52:00.000+05:00

لبنان میں خا ک و خون کا کھیل جاری ہے، ہالوکاسٹ کے نام پر دنیا سے ہمدردیاں سمیٹنے والا اسرائیل انسانی اور اخلاقی حقوق کی کھلم کھلا خلاف ورزیاں کرتے ہوئے وہ سب کچھ کر رہا ہے جس کا عشرِ عشیر بھی کسی مسلمان ملک سے سرزد تو امریکہ ، اس کے اتحادی اور ان کا میڈیا آسمان سر پر اٹھا لیتا۔ بش پاگل ہوجاتا اور کونڈو لیزا رائس کی فتنہ سامانی دو چند ہوجاتی۔ مگر لبنان میں بہتالہو اتنا سستا اور بے توقیر ہے کہ کونڈی کا فرمان ہے ابھی جنگ بندی کا وقت نہیں آیا۔
دشمن تو خیر دشمن ہے اپنوں کی یہ حالت ہے کہ کسی مسلمان حکمران نے اب تک کھل کر مذمت کے رسمی الفاظ تک ادا نہیں کیے کہ غلاموں کو بولنے کے لیے بھی آقا کی اشیر باد چاہیے۔ ابھی تک او۔آئی۔سی کے ہنگامی اجلاس کی ضرورت محسوس نہیں کی گئی۔ بس چند سو غیرت مند ہیں جو اسرائیل کی جان کو آئے ہوئے ہیں ۔ اور اسرائیلی سورما عورتوں اور بچوں پر بم برسا کر داد شجاعت دے رہے ہیں۔ 30 جولائی کو اسرائیلی فضائیہ نے قانا کی ایک عمارت میں پناہ لینے والے 27 معصوم بچوں سمیت 55 سویلین کو درندگی کا نشانہ بنایا۔
انسانی بے حسی اور بے بسی کے کچھ مناظر یہاں دیکھیے

ابہام در ابہام

2006-07-31T21:33:00.000+05:00

میں کچھ اور لکھنے کے موڈ میں تھا لیکن ابھی ابھی جب نبیل کے بلاگ پر اپنا ایک سوال کا جوب دیکھا تو حقیقی معنوں میں مجھے اپنا دل ڈوبتا ہوا محسوس ہوا۔ دوبارہ اپنی گزشتہ پوسٹ کو حرف بہ حرف پڑھا لیکن وہ بات جس کا سارے افسانے ذکر نہ تھا وہ ان کو بہت ناگوار گزری ہے ( صحیح شعر اس وقت یاد نہیں آرہا ) والا معاملہ لگا، پوسٹ کے عنوان سے لے کر آخر تک موضوع صرف اور صرف شعیب ہے نہ کہ انڈیا کے مسلمان۔ نبیل نے کہا آپ کی پوسٹ پڑھ کر مجھے واقعی صدمہ ہوا تھا۔ ہندوستان میں بسنے والے مسلمانوں کی تعداد پورے پاکستان کی آبادی سے زیادہ ہے۔ آپ کی منطق کو مان لیا جائے تو کیا وہ سارے چانکیہ کے پیروکار ہیں؟ کیا یہی کچھ آپ گجرات میں جل کر مرنے والوں کے متعلق بھی کہیں گے؟ یہ بات واقعی قابلِ افسوس ہے اگر میں نے یہی کہا ہو، میں نے کہا تھا عام طور پر شعیب کا انداز بڑا سادہ اور شائستہ ہوتا ہے لیکن افسوس کہ ہندوؤں کی صحبت میں اس نے بھی وہی چانکیہ والا فلسفہ سیکھ لیا جس کی ساری بنیاد منافقت پر کھڑی ہے “بغل میں چھری اور منہ میں رام رام “ اس فلسفہ کا جزوِ اول ہے اور وہ ہندوستانیوں والی بات میں نے کہا تھا اپنی گندی ای میل میں دھمکی دیتے ہوئے کہا ہے کہ “ یہ ایک ہندوستانی کے الفاظ ہیں“۔ اس کا کہنا صحیح ہے ہم ہمیشہ ہندوستانیوں ( مستثنیات سے معذرت ) کے الفاظ پر اعتماد کرتے رہے ہیں لیکن چانکیہ کے سانپ خصلت چیلے اپنے لچھے دار لفظوں میں الجھا کر ڈسنا جانتے ہیں اور بس۔۔۔۔۔۔۔۔۔۔۔ ملاحظہ کیجیے ہندوستانیوں کے ساتھ بریکٹ میں مستثنیات کے الفاظ موجود ہیں۔ وہ تحریر میں نےغصے میں ضرور لکھی تھی لیکن ہوش و ہواس سے بلکل ہی بیگانہ نہیں ہوا تھا۔ اور انڈین مسلمان جو بقول شخصے “ کربلا “ میں رہ کر بھی اسلام پر قائم ہیں میں تو انہیں اپنے سے کہیں زیادہ باعمل مسلمان سمجھتا ہوں۔
اسی کے ساتھ نبیل صاحب نے برادرم اردو دان کی تازہ ایک تحریر کا بھی لنک دیا ہے اس بات پر میں واقعی نبیل کا تہہ دل سے شکر گزار ہوں ورنہ میرے جیسا سطحی سوچ رکھنے والا شخص یہ سمجھ ہی نہ پاتا کہ اس تحریر میں مخاطب کون ہے میں اس لمحے کو بھی مبارک سمجھتا ہوں جس لمحے میں نے نبیل سے یہ سوال کیا تھا کہ میں کون سی باتوں کو سیاق وسباق سے باہر لے گیا تھا۔ ورنہ ایک اچھا شخص اور مسلمان ( اردو دان ) مجھ سے ناراض رہتا اور مجھے خبر تک نہ ہوتی کیونکہ میں تو یہی سمجھ رہا تھا کہ میں نے جو کچھ لکھا وہ شعیب کے لیے لکھا۔
لہٰذا یہ عدالت یعنی ضمیر کی عدالت اس نتیجے پر پہنچی کہ ایک اچھے انسان اور دوست کا دل دکھانے پر میں اردودان سے معافی مانگنی چاہیے۔اس کے علاوہ بھارت سے تعلق رکھنے والے دیگر اچھے اور اعلیٰ ظرف لوگوں ( مجھے یقین تو نہیں کہ کسی اور نے وہاں میرا بلاگ پڑھا ہو ) سے معافی کا طالب ہوں۔ یہ تو رہا بلاگ کا معاملہ، اب میں اردو دان بھائی سے ان کے بلاگ جا کر معذرت طلب کرتا ہوں۔

شعیب کی ای میل پر ردِ عمل

2006-07-27T16:36:00.000+05:00

معاملات کافی دور تک چلے گئے ہیں کچھ دوستوں پر پابندی لگا دی گئی، میرے خیال میں اردو ویب والوں کو ایک مرتبہ وارننگ دینی چاہیے تھی۔ لیکن خیر اردو ویب والے بادشاہ ہیں ان کی اپنی سائیٹ ہے جو مرضی کریں۔
میں اس پر تبصرہ کرنے کے لیے اردو بلاگ پر گیا تھا کہ وہاں عزیزم بد تمیز ( سیالکوٹ والے ) کی ایک ای میل پڑھی جس کا ردِ عمل کے طور پر یہ تحریر لکھ رہا ہوں۔
شیخو کے بلاگ پر شعیب کی طرف سے کی گئیں دو ای میلز رکھی گئیں ہیں جن میں ایک شیخو کے نام ہے اور ایک بد تمیز کے نام ، ان میلز کو آپ یہاں دیکھ سکتے ہیں۔ ان میں شعیب کا جو لہجہ ہے ۔۔۔۔ حیرانگی ہوتی ہے نہایت ملائم اور شائستہ انداز میں بات کرنے والے شعیب کا یہ انداز ۔! اب میں یہ نہیں کہوں گا کہ میں اس ناشائستہ لہجہ پر شعیب کی مذمت کرتا ہوں کیونکہ مذمت بہت نرم الفاظ ہیں میرا جی تو کچھ اور چاہتا ہے، شعیب نے کہا ہے کہ “ ہمارے تعلقات بہت دور تک ہیں ۔۔۔۔۔۔۔“ اتنا گھٹیا پن ؟
شعیب کا تعلق انڈیا سے ہے ایک مسلمان گھر میں پیدا ہونے والے شعیب کا دعویٰ ہے کہ وہ ایک غیر مذہب ہے اور آزاد خیال ہے ہمیں اس پر اعتراض نہیں اور نہ ہی پابندی کا شکار ہونے والوں نے اس پر اعتراض کیا تھا۔ معاملہ اس وقت خراب ہوتا خراب ہوتا ہے جب انسان اپنے ذہن کی گندگی دوسروں پر اچھالتا ہے اس سے ماحول خراب ہوتا ہے جو ہر شخص کو الگ الگ انداز سے متاثر کرتا ہے۔ گذشتہ سال شعیب نے اپنے بلاگ پر نبی پا ک صلی اللہ علیہ وسلم کا خا کہ شائع کردیا تھا چونکہ اس کے ساتھ “ ایک خبر “ لکھا ہوا تھا اس لیے ہم میں سے ا کثر نے معاملہ فہمی سے کام لیا اور پھر کچھ لوگوں کے احتجاج پر اس نے یہ خا کہ بلاگ سے ریموو بھی کردیا تھا۔
عام طور پر شعیب کا انداز بڑا سادہ اور شائستہ ہوتا ہے لیکن افسوس کہ ہندوؤں کی صحبت میں اس نے بھی وہی چانکیہ والا فلسفہ سیکھ لیا جس کی ساری بنیاد منافقت پر کھڑی ہے “بغل میں چھری اور منہ میں رام رام “ اس فلسفہ کا جزوِ اول ہے ۔
شعیب نے کہا ہے اپنی گندی ای میل میں دھمکی دیتے ہوئے کہا ہے کہ “ یہ ایک ہندوستانی کے الفاظ ہیں“۔ اس کا کہنا صحیح ہے ہم ہمیشہ ہندوستانیوں ( مستثنیات سے معذرت ) کے الفاظ پر اعتماد کرتے رہے ہیں لیکن چانکیہ کے سانپ خصلت چیلے اپنے لچھے دار لفظوں میں الجھا کر ڈسنا جانتے ہیں اور بس۔۔۔۔۔۔۔۔۔۔۔
غصے میں لکھنا بہت دشوار ہے اس لیے میری تحریر بے ربط ہورہی ، بس اتنا ہی کہنا ہے کہ اگر اس کو پا کستان ہندوستان کا ہی مسئلہ بنانا ہے تو پھر یہی سہی ، ہم لمبے ہاتھوں کو کاٹنا بھی جانتے ہیں اور زبان درازوں کی زبان گدی سے کھینچ لینا بھی ۔ بس ذرا سادہ دل واقع ہوئے ہیں میٹھے بول کہیں کا نہیں رہنے دیتے ۔
ملاحظہ کیجیے شیخو کا بلاگ

منانا رتجگا اور سوچنا بارے اردو فونٹس کے

2006-07-23T13:05:00.000+05:00

لوڈشیڈنگ باقاعدہ شروع کر دی گئی ہے ، باقاعدہ کا مطلب کہ آئیسکو نے شیڈول کا اعلان کر دیا ہے کہ شہروں میں چار سے پانچ گھنٹے اور دیہاتی علاقوں آٹھ گھنٹے روزانہ۔ رات کو جونہی چوہے (ماؤس) کی گردن پر ہاتھ رکھا بجلی چلی گئی لیکن بجلی والوں کی مہربانی کہ انہوں ایک ہی مرتبہ پانچ گھنٹے روکنے کے بجائے وقفے وقفے سے بجلی روکنے کا سلسلہ جاری رکھا۔ ہر دفعہ بجلی کے ساتھ نیند بھی جاتی اور ساتھ ہی واپس آتی البتہ تیسری دفعہ بجلی ا کیلی ہی آئی۔ رات، تنہائی اور رتجگا، نجانے کتنے ہی خیالات نے یلغار کیے رکھی۔ ایک خیال بار بار آتا جس سے میں کچھ دنوں سے دوچار ہوں، فون کی خرابی کے باعث نیٹ کلبوں کی خا ک چھان رہا ہوں اور ہمارے نیٹ کلبوں نے ابھی تک ونڈوز 98 کو معاف نہیں کیا اور موصوفہ (ونڈوز) کو اردو سے خدا واسطے کا بیر ہے ہی اردو پڑھنا بھی مسئلہ بن جاتا ہے، اپنے اس بلاگ پر میں نے نفیس ویب نسخ فونٹ بائی ڈیفالٹ سیٹ کیے تھے، پتہ چلا یہ ونڈوز 98 پر کام نہیں کرتے یعنی وہی اردو نسخ ایشیا ٹائپ خط دوبارہ۔ اردو نسخ فونٹس کی مقبولیت کی وجہ شاید بی۔بی۔سی کی وجہ سے ہے ورنہ ان میں کوئی خاص بات نہیں، سب سے بڑ ی کمزوری جو مجھے محسوس ہوئی وہ یہ کہ بولڈ نہیں ہوتے۔ اردو لائف کے فونٹس کے ساتھ ایک مسئلہ یہ بھی ہے کہ ونڈوز 2000 پر انہیں ہر بار ونڈوز سٹارٹ کرنے پر دوبارہ کاپی کرنا پڑتا ہے۔
اس حوالے سے ایک امید افزا خبر محسن حجازی صاحب دیتے ہیں کہ عنقریب پا ک نستعلیق فونٹس کو چند دن میں ریلیز کردیا جائے گا یہ فونٹس کیسے ہیں؟ یہ تو ان کے آنے پر بتایا جاسکتا ہے پتہ نہیں یہ لینکس پر کام کرتے ہیں یا نہیں ! اگر لینکس پر کام نہیں کریں گے تو ہماری دلچسپی یقیقاّ آدھی رہ جائے گی اور امید ہے کچھ عرصے بعد یہ دلچسپی مکمل طور پر ختم ہوجائے گی یعنی ونڈوز سے رشتہ ٹوٹا تو پا ک نستعلیق سے بھی ٹوٹا۔
لیکن محسن حجازی صاحب جیسے “ نستعلیق“ لوگ کسی کو مایوس نہیں کرتے اس لیے انہوں نے اوپن سورس فونٹ اردو نستعلیق بنانے کا اعلان کیا ہے اس کام کے لیے انہوں نے ایک ٹیم بھی ترتیب دی ہے ۔ اور میں حسبِ معمول یہاں بھی دیر سے پہنچا ( حلانکہ میں اقبال نہیں ہوں) ورنہ ان کی ٹیم میں عدد “ نکمے “ کارکن کی جگہ موجود تھی جس پر بجا طور پر میں کولیفائی کرجاتا۔ خیر ! محسن صاحب اور ان کی ٹیم کام شروع کیا چاہتی ہے اس لیے ہماری دعائیں ان کے ساتھ ہیں اور اس کے ساتھ ہی ہماری اخلاقی مدد بھی۔۔۔اور آپ توجانتے ہیں “زمانہ جاہلیت “میں ہم کشمیر یوں کے ساتھ ساتھ پوری دنیا کے مسلمانوں کی اخلاقی مدد کیا کرتے تھے ، نئی روشنی کے دور میں یہ سب کچھ قدامت پرستی کی علامت سمجھا جاتا ہے، اسی بات پر آج کل ہمارے کالم نگار رو رہے ہیں کہ صدر صاحب نے اپنی تقریر میں لبنان والوں کی دلجوئی نہیں کی، ویسے رونا تو ہمیں بھی چاہیے مگر ہمارے پاس “ مقاماتِ آہ و فغاں اور بھی ہیں “ جی ! تو کہنے کا مطلب یہ ہے ہماری نیک خواہشات اوپن سورس نستعلیق فونٹ بنانے والوں کے ساتھ ہیں۔
بات شروع ہوئی تھی لوڈشیڈنگ اور رتجگے سے کہ نیند نہیں آئی البتہ رات ڈھلے ، صبح سے ذرا پہلے “ حضرتِ ابلیس “ اسے کہیں سے ڈھونڈ کر لے آئے اور ہم پر طاری کردیا، ویسے تو موصوف سے ہماری بچپن کی یاری ہے لیکن نجانے کیوں ہر وقت انہیں دھڑکا لگا رہتا ہے کہ ہم کہیں “ اماں شاید ملے اللہ ہو میں “ کا نعرہ مار ان سے باغی نہ ہوجائیں۔

یہ کیسا انصاف ہے

2006-07-20T20:44:00.000+05:00

ایسا لگتا ہے کوئی طنزیہ ڈرامہ چل رہا ہے اور موضوعِ طنز انصاف ہے ۔ابھی ڈرامہ ختم ہو گا اور سب کچھ ٹھیک ہو جائے گا ۔ لیکن حقیقت یہ ہے کہ ڈرامہ تو چل رہا ہے پر سب ٹھیک والی بات کچھ درست نہیں ہے کیونکہ زندگی کے سٹیج پر کھیلے جانے والے ڈرامے پردہ سیمیں پر چلنے والے ڈراموں قطعی مختلف ہوتے ہیں۔ لبنان پر اسرئیلی حملے کو آٹھواں دن اختتام کو ہے اس عرصے میں اسرائیل نے تمام اخلاقی حدود کو بالائے طاق رکھتے ہوئے شہری علاقوں پر حملے کیے جس میں بے گناہ خواتین ، بچوں اور بوڑھوں کو شہید کیا جارہے خود کو انسانی حقوق کا علمبردار کہنے والے خاموش ہیں۔ امریکہ جس کا دعوٰی ہے کہ وہ عراق اور افغانستان کے لوگوں کو آزادی دلانے آیا ہے اسے اپنے ناجائز بچے کی طرف سے لبنان کی آزادی و خود مختاری پر حملہ نظر نہیں آرہا اور تو اور آج اقوامِ متحدہ نے بھی تسلیم کیا ہے کہ جنگی جرائم ہو رہے ہیں چلو، کفر ٹوٹا خدا خدا کر کے۔
اسرائیل یہ سب کچھ بظاہر ایک فوجی کی خاطر کر رہا ہے کیا واقعی ایسا ہی ہے۔؟ یقیناّ نہیں ۔ پوچھے تو کون پوچھے۔۔۔؟ حکمرانوں کو اپنی پڑی ہوئی ہے ہر کسی کا “ بلیک میلنگ سٹف Black mailing stuff" امریکہ کے ہاتھ میں ہے۔ چناچہ جمہوریت کے نام سے عربوں کی جان جاتی ہے اور ہمارے روشن خیالوں کو ابھی قوم کا مفاد عزیز ہے ، ابھی ان کا جذبہ خدمت سرد نہیں ہوا، آثار بتاتے ہیں کہ جیتے جی ختم ہوگا بھی نہیں ۔ لہٰذا کسی میں یہ جرات نہیں کہ وہ امریکہ بہادرکی خدمت یہی عرض کردے کہ حضور یہ کیسا انصاف ہے ۔؟ اور کچھ نہیں توانصاف اور آزادی کے نام پر یہ ڈرامے بازی تو بند کر دو۔

لائیو سکور بورڈ

2006-07-15T19:27:00.000+05:00

کرکٹ کا شوق تو کب کا ہوا ہو چکا۔ بس یونہی تھوڑی دیر پہلے محفل پر لائیو کرکٹ بورڈ دیکھا وہیں پر ایک سائٹ کا لنک بھی دیا ہوا تھا سوچا، تجربہ ہی سہی۔ سائیڈ بار پر موجود لائیو سکور بورڈ اگر آپ کو پسند آیا ہو تو درج ذیل لنک سے سکرپٹ حاصل کر لیں۔

Live Score Board

پولیس کی شان میں

2006-07-14T17:55:00.000+05:00

راولپنڈی سے آتے ہوئے ہم نے دیکھا موٹر وے پولیس نے ایک موٹر سائیکل سوار کو روک رکھا تھا اور پولیس کا سپاہی جس کے ہاتھ میں کچھ کاغذات تھے اور ان پر کچھ لکھنے کے ساتھ ساتھ موٹر سائیکل سوار سے مسکرا کر باتیں کر رہا تھا۔ پولیس کا سپاہی اور یوں ہنس ہنس کر باتیں کرے اور وہ بھی " شکار " کے ساتھ ! یہ میرے لیے حیرت کی بات تھی ۔ یہ منظر ہمارے ٹیکسی ڈرائیور نے بھی دیکھا۔ کہنے لگا ایک موٹر وے پولیس ہے جو ڈرائیور کے ساتھ انتہائی خوش اخلاقی کے ساتھ پیش آتی ہے اور ایک ہماری ٹریفک پولیس ہے بھتہ المعروف منتھلی بھی لیتی ہے تو اس طرح کہ ہم پر احسان کیا ہو۔ ٹیکسی ڈرائیور جو پنڈی اسلام آباد ٹریفک پولیس کا ڈسا ہوا تھا کافی دیر تک اس پر تبصرہ کرتا رہا۔
دیکھا جائے تو ایک طرف ٹریفک پولیس نے لوگوں کی زندگی اجیرن کر رکھی ہے تودوسری طرف تھانے عذاب بنے ہوئے ہیں مجرموں پر کرم اور شرفاء پر ستم ، پولیس کو سنگدل محبوب سے بھی تشبیہ نہیں دی جاسکتی کہ وہاں ایک لذت ہوتی اور یہاں۔۔۔۔? اوپر سے پولیس والوں کی منطق بھی عجیب ہوتی ہے ہمارے پڑوس میں ایک ٹریفک کانسٹیبل رہتا تھا اس کی ذاتی گاڑیاں تھیں وہ اس کو اللہ کا فضل قرار دیتا تھا ا کثر ہمیں بتاتا کہ آج اللہ نے بڑا کرم کیا مغرب سے پہلے پہلے پانچ سو کما لیے۔
ایسا نہیں کہ سارے پولیس والے ایسے ہیں بس ان کے خلاف عمومی تاثر یہی پایا جاتا ہے پولیس سڑک پر ہو یا تھانے میں ، دونوں نے اپنے دوستوں سے زیادہ بلکہ بہت زیادہ دشمن پیدا کیے ہیں ۔ شریف آدمی کی تو پولیس کو دیکھ کر ہی جان نکلتی ہے جو حالت پولیس کو دیکھ کر مجرموں کی ہونی چاہیے تھی وہ شریف آدمی کی ہوتی ہے۔ اور اس میں سب سے پہلا نمبر پنجاب پولیس کا ہے ۔ میں نے ذاتی طور پر پورا پا کستان نہیں دیکھا البتہ صوبہ پنجاب اور صوبہ سرحد کافی حد تک دیکھ رکھا ہے۔ میرا مشاہدہ ہے کہ سرحد کی ٹریفک پولیس ، پنجاب پولیس کی نسبت کافی معصوم ہے ۔حیرت کی بات یہ ہے کہ اچھا خاصا معقول نظر آنے والا بندہ جب پولیس کی وردی پہنتا ہے تو اس میں کوئی ایسی نامعقول روح حلول کر جاتی ہے جس سے شریف آدمی کی روح فنا ہوتی ہے ۔ اور جن لوگوں کو پولیس تھانے کے اندر یا برلب سڑک ذلیل کرتی ہے وہ انہی لوگوں میں سے ہوتے ہیں ان کے والدین ، بہن بھائی اور اولاد ایسی ہی ہوتی ہے لیکن پولیس والے وردی پہن کر اپنے آپ کو کسی اور ہی سیارے کی مخلوق سمجھنے لگتے ہیں اور عام آدمی کی ان کے سامنے کوئی وقعت نہیں ہوتی۔
بات شروع ہوئی تھی موٹر وے پولیس سے کہ اس نے کچھ تھوڑا سا پولیس کلچر کو تبدیل کیا ہے ۔ حکومت کو چاہیے کہ عام پولیس کو موٹر وے پولیس کی صحبت سے استفادہ کروائے لیکن خدشہ ہے کہ کہیں الٹا اثر نہ ہوجائے اور کل ہم موٹر وے والوں کی ہجو لکھ رہے ہوں۔۔۔۔!

اسی پولیس گردی کے متعلق ایک مضمون یہاں دیکھیے۔

طیارے کا حادثہ

2006-07-11T17:22:00.000+05:00

پی آئی اے کا ایک فوکر طیارہ گزشتہ روز ملتان کے قریب گر گیا جس میں سوار تمام 45 افراد ہلاک ہو گئے ان میں 43 مسافر اور 4 عملے کے ارکان تھے۔ اس کے ساتھ کھیتوں میں کام کرنے والی ایک خاتون بھی ہلاک ہوگئیں۔

طیارے میں جاں بحق ہونے والوں میں بہاؤالدین زکریا یونیورسٹی کے وائس چانسلر، پاک فوج کے دو بریگیڈئر اور لاہور ہائی کورٹ کے دو جج صاحبان بھی شامل ہیں۔

دعا ہے اللہ پا ک مرحومین کو جوارِ رحمت میں جگہ عطا فرمائے۔

ہائے گرمی

2006-07-10T19:01:00.000+05:00

آج کل میں جس دفتر میں بیٹھتا ہوں اس کے اوردھوپ کےدرمیان ایک چند انچ موٹی چھت حائل ہے۔ جس کا کام صرف اتنا ہے کہ سورج کی مضر صحت یعنی ایسی شعاؤں کو فلٹر کرلیتی ہے جن کے باعث انسان کا دماغ ابلنے لگے اور پنکھے کی کوشش ہوتی ہے کہ تمام گرمی کو اپنی خالص حالت میں ہم تک پہنچائے ۔ ایسے عالم میں میرے دو ہی شغل ہیں ٹھنڈے ٹھنڈے مناظر پر مشتمل وال پیپرزلگا کر انہیں دیکھتا رہتا ہوں یا اپنے دیس کے شمالی علاقے یاد آتے ہیں کبھی تصور کھینچ کر کاغان اور ناران کی وادیوں میں لے جاتا ہے اور کبھی جھیل سیف الملوک کے آس پاس یا پھر وہ یاد گار سفر جو ہم نے جھیل سیف الملوک سے آنسو جھیل کی طرف کیا تھا جب چل چل کر ہم تھک کر گرنے والے تھے کہ پہاڑی کے پیچھے سے ایک گلیشئر برآمد ہوا ہاں ! اس وقت ایسا ہی لگا تھا کہ ہم گلیشئر تک نہیں بلکہ گلیشئر ہماری طرف آیا ہے ۔
چترال سے جب ہم جیپوں پر گرد اور مٹی سے اٹے ہوئے بھوتوں جیسی شکلوں کے ساتھ کیلاش ( کافرستان ) پہنچے ۔ندی ، نالے، جھرنے کہ ایسے مناظر کہ خواب میں بھی نہ دیکھے ہوں۔

اور سوات ۔۔۔۔۔۔۔ کے متعلق تو ایک پختو شاعر کا کہنا ہے کہ سوات بادشاہوں کی سر زمین ہے۔ ان سفروں کا تفصیلی احوال پھر کبھی انشااللہ ۔ اس وقت تو بس دل کو بہلانے کا ایک بہانہ۔

السلام علیکم

2006-07-07T20:00:00.000+05:00

یادش بخیر ! ایک اردو ویب بلاگ ہوا کرتا تھاجو بوجوہ نہ رہا۔ چونکہ خا کسار کے دل کے کمپیوٹر پر نصب شدہ محبت نامی آپریٹنگ سسٹم پر جو بہت سے وائرس حملہ آور رہتے ہیں ان میں ایک وائرس اردو نام کا بھی ہے اور آپ تو جانتے ہیں کہ وائرس استعمال کنندہ کے احکام Commands کے تابع نہیں ہوتا۔ زیرِ نظر بلاگ کا موردِ الزام یہی وائرس ہے۔

آپ سے گزارش ہے کہ آپ کے بلاگ پر یا اگر ذہن میں کوئی لنک urduweblog.blogspot.com کے نام سے ہے تو اس کو baazgasht.blogspot.com سے بدل دیں نام وہی ہے۔

عتیق الرحمان